السبت، 29 أكتوبر، 2016

حظر الكحوليات في العراق .. بالعامية



اليوم من نجي نحظر الكحوليات بالعراق درسنا الوضع لو مجرد قربت الانتخابات ونريد بحصد اصوات بهيج وضع ..
كولوا عني مخبل (ميخالف قابل) تدرون هذا القرار خطأ في خطأ 
المفروض :
- تفتحون بارات اضافية وكذلك جديدة بالمحافظات ، ليش؟ * حتى الشباب تتوجه للخمر بدلا من ضياع الكم الكبير من شبابنا حاليا ضحايا للمخدرات وبالتالي راح نضرب عصفورين بحجر هو ابتعاد الشباب عن المخدرات وتقليل نسب الجريمة (معدل ارتكاب الجرائم عال جدا لمتعاطي المخدرات مقارنة بالمعدل الضعيف لمتعاطي الكحول)
- الحدود لازم يصير الها حل ( نمنع تسلل الحبوب وباقي اصناف المخدرات - هنا لازم وزارة الصحة تفتح مراكز معالجة لمدمني المخدرات) ونفرض ضريبة او تعريفة كمركية على الكحول المستورد لترتفع اسعاره في البارات المفتوحة وبالتالي سيكون هناك منتج وطني ايضا الفائدة منه ستعرفوها لاحقا) .
- المرحلة القادمة راح نجي نرفع اسعار الكحول وبالتالي تكون غالية ثم باهضة الثمن ليصعب شراءها مع هذه المرحلة على وزارة الصحة فتح مراكز رعاية او علاج لمدمني الكحول) .. وبالتالي صارت هنا معالجة رويدا رويدا
- بعد كل ماتقدم هنا تخفض اعداد البارات حسب حاجة المحافظة وتقليل كميات الانتاج باعتبار ان المنتج وطني يمكن السيطرة عليه من قبل الحكومة
- المرحلة الاخيرة لاننسى اكو ديانات اخرى واكو ناس مو مسلمين ميصير نحرم عليهم اللي المحرم علينا ولكن نحاول نضع حلولا بسيطة للتجاهر بشربه وتجارته واتفاقات ووضع غرامات وحبس وقانون يحكم ذلك ، ثم الاهم نفرض غرامات مالية عالية على المسلمين حصرا في حال ثبت احتساءه او التجارة فيه وماشابه ذلك .. مو اجي اعمم قانون على بلد كامل بيه المسلم وغير المسلم ..
-- بعدين اكو كومة شغلات بشرفكم تدرون وين ينباع عدنه بالديوانية لو شلون يطب لو من تجاره (حتى مسيح الديوانية بعد 2003 كلهم هاجروا بقوا بس عائلتين يشتغلون بمعمل البان الديوانية وهسة يردون يشردون لاستراليا)
- من تجي تحظر الكحوليات انت شايف المخدرات شنو دتسوي بالشباب وكم عدد متعاطيها واين مراكز علاج مدمنيها وشنو البدائل لانقاذهم ..
- من تجي تحظر الكحوليات انت تعرف س الوجيه صاحب حسينية كذا وميجيب الا الرادود ابو شدات الدولارات حتى يحيي محرم هو جزء من تجارته (مخدرات)، لو شيخ فلان (تعرفوه) هو تاجر مخدرات، لو عضو مجلس المحافظة الفلانية لو البرلماني الفلاني لو الوزير الكذائي لو الرتبة الفلانية لو المصيبة الكبرى (الشرطي الفقير ، يكمشوهم وتصير الحباية بهلكد وبالمرافقات التجارة تصير) ..
- من تجي تحضر الكحوليات انت وفرت للشعب قوته وهيأت له وسائل وسبل انتعاشه ورفاهيته مو هو ضيمكم وضيم الدين راح يشرب ..
- من تجي تحظر الكحوليات بهيج فوضى يعيشها البلد انت شنو من عقل شايل لو الحظر يصير بس الفقرة وانت عادي
- ماادريد اسولف سالفة سايق بغداد من يبات بالعلاوي ويروح بالليل للبار يلكي الطاولات المن محجوزة  ..!!!!
* من تريد تحظر هيج اشياء احظر الاشياء الاكبر منها وشوفوا حل لنهب البلاد والفساد اللي أكل البلد وأكل اعمار شباب ومزيداتكم الناقصة وعمالتكم اللي باعت البلد وكتبت النهاية السيئة لشباب العراق
- تريد تحظر احظر اني مو ضد الحظر بس يكون بدراسة ورعاية وعناية اما بهيج طريقة وهيج فوضى لا اني اعترض وروح اشتكي عليّ وين متريد
بس ملحوظة اخيرة
اتحدى اكبر واحد يجيب لي (شارب خمر) ماعنده غيرة والله تلكي عدهم الغيرة والشهامة والنخوة والانسانية والثقة وفوكاهن كلهن تلكيه يموت على وطنه والوطنية عده فول وميجامل على حساب وطنه مومثلكم ...